الانجلش في بداية المرحلة الجامعية

أي طالب ثانوية عامة بيبدأ بعد اما يخلص وتظهر نتيجته يفكر في موضوع كورسات الانجلش ولو مش هياخد كورسات بيبدا يفكر ازاي هيطور من نفسه الكتب كلها في الجامعة بالانجلش ومعظم شرح الدكاترة بالانجلش ويقعد محتار طب هعمل ايه !! واروح فين !!


بص يسيدي الموضوع بسيط جدا, هنقسمه جزئين
الجزء الاول : جزء الانجلش في الدراسة
الجزء الثاني : جزء تطوير اللغة


بالنسبة للجزء الاول :  سواء كنت في كليات طبية او كليات غير طبية او اي كلية فيها كتب بالانجلش فمش عاوزك تقلق وتقول انك مش هتفهم الكتب ولا هتفهم حاجة من الدكاترة, كل الافكار دي كانت بتجلينا واحنا داخلين الجامعة وبعدها اكتشفنا انها افكاره خاطئة, انت طبيعي جدا علي حسب كليتك هتقابلك مصطلحات جديدة وكبيرة في الكلية بس المصطلحات دي هتتكرر معاك كل يوم وهتكرر فاليوم اكتر من مرة فهي مسألة وقت وهتلاقي نفسك عندك حصيلة لكل المصطلحات وهتقدر تفهم الدكاترة كلهم وتفهم كل حرف موجود في الكتاب, كمان الدكاترة في بداية الدراسة بيتجرموا كلامهم لحد اما المصطلحات دي تبدأ تثبت عندك, بص التعويذات دي كدا بياخدوها طلبة كلية الطب في سنة اولي  
psuedo stratified columnar epithelium with goblet cell
profunda brachii humral artery
supra scapular notch
شايف كل التعويذات دي, تحس انها تخوف كدا وكلام كبير والكليات صعبة والانجلش صعب والدكاترة بتشرح انجلش ومش هنفهم حاجة وتدخل نفسك في متاهات كبيرة بقي, بس الموضوع غير كدا خالص عايزك تطمن خالص وتعرف ان التعويذات دي كلام سهل جدا بس اما تاخد المصطلحات والدكاترة هيفهموك معناها وتتكرر معاك في اليوم اكتر من مرة هتلاقي الموضوع بسيط جدا وهكذا الموضوع علي كل الكليات مش الطب بس فاطمن يعني


بالنسبة للجزء الثاني : فهو اختياري بالنسبالك, وهو انك تظبط بقي skills اللغة بتاعتك عشان لما تيجي تسافر او تقدم فشركة محترمة او اي حاجة كدا محتاجة ايلتس فتبقي جاهز, بس من غيره هتقدر تكمل دراستك عادي بس كدا كدا لو ناوي علي سفر هتحتاج تذاكر بقي بعد الكلية فممكن انت تشتغل علي نفسك من دلوقتي وتبدا تظبط الانجلش بتاعك من دلوقتي بس دا ملوش ادني علاقة بدراستك جوا الكلية ولا هيفيدك فيها جامد اوي ممكن يفيدك لو هتجيب شروحات اجنبية كدا يعني وغالبا اي حد بيقدر يترجمها فهو الموضوع اختياري ومش هياثر عليك بس لازم بردو تذاكره لانه مهم.